Ipinangako ng Department of Human Settlements and Urban Development na tatapusin ang lahat ng natitirang proyektong pabahay para sa mga biktima ng Super Typhoon Yolanda.
Ayon kay DHSUD Secretary Jose Rizalino Acuzar, makukumpleto na ng National Housing Authority ang natitirang 4,702 housing units sa ilalim ng Yolanda Permanent Housing Project sa Disyembre ngayong 2025.
Sa ngayon, nakakumpleto na ang NHA ng 53,917 units mula sa 58,619 permanenteng kinakailangan sa pabahay sa ilalim ng YPHP.
Mula sa mga natapos na unit, may kabuuang 45,454 units na ang inookupahan ng mga benepisyaryo.
Ang mga housing unit ay matatagpuan sa Cool Spring Residences, Riverside Community Residences, Mont Eagle Ville Subdivision, Coconut Grove Village, Dagami Town Ville, at Pastrana Ville, lahat sa Leyte; Marabut Ville Sites 1 at 2 sa Samar; at ang Culaba Housing Project sa Biliran. | ulat ni Rey Ferrer
