Naghain si Senate Majority Leader Joel Villanueva ng isang resolusyong naglalayong imbestigahan ang patuloy at paulit-ulit na problema ng pagbaha sa Metro Manila at ilan pang mga lugar sa bansa.
Sa isinulong na Senate Resolution 693 ni Villanueva, layong makabuo ng isang panukalang batas na makapagpapabuti ng urban drainage system at maprotektahan ang Metro Manila at mga mabababang lugar sa bansa mula sa pagbaha.
Giit ng majority leader, kinakailangang repasuhin ang mga polisiya at rebyuhin ang mga programa at plano ng DPWH, MMDA, Department of Environment and Natural Resources (DENR) at iba pang ahensya ng gobyerno tungkol sa pagtugon sa baha.
Maliban sa Metro Manila, ilan pa sa binanggit ng senador na nakakaranas ng pagbaha ang Dagupan City, Pampanga, Bataan, Bulacan, Lanao del Norte, Zamboanga City, Cebu City, at Davao City.
Ipinunto ng mambabatas na sa kabila ng marami nang pag-aaral tungkol sa flood control measures ay nagpapatuloy pa rin ang problema sa pagbaha, hindi lang mga urbanisadong lugar sa Pilipinas, kundi maging sa mga kanayunan. | ulat ni Nimfa Asuncion
