Iinspeksyunin ni Philippine National Police (PNP) Chief Police General Benjamin Acorda Jr. ang sitwasyon sa Manila North Cemetery ngayong araw para masiguro na maayos ang inilatag na seguridad ng PNP sa paggunita ng Undas.
Una nang inanunsyo kahapon ni PNP Public Information Office Chief Police Colonel Jean Fajardo na aabot sa 27,161 pulis ang ipakakalat sa iba’t ibang sementeryo, memorial parks, at major thoroughfares kabilang ang transportation hubs.
Kasama rin sa paghahanda ng PNP para sa okasyon ang pagtatatag ng 4,866 Police Assistance Desk na tutugon sa iba’t ibang pangangailangan ng publiko.
Pinaalalahanan naman ni Fajardo ang publiko na huwag dalhin ang mga maliliit na bata, matatanda, at buntis dahil sa inaasahang dami ng mga magtutungo sa mga sementeryo.
Iwasan din aniya ang pagbibitbit ng mga matutulis na bagay, alak o inuming nakalalasing, at malaking halaga ng pera. | ulat ni Leo Sarne
