Hindi magpapatinag ang PNP sa bantang pagsasampa ng kaso laban sa kanila ng POGO sa Las Piñas na ni-raid noong nakaraang linggo.
Giit ni PNP Public Information Office Chief Police Brig. Gen. Red Maranan, na itutuloy ng PNP ang dokumentasyon ng mga nalalabi sa mahigit 2,000 empleyado ng POGO hanggang sa matapos ito.
Ito’y sa kabila ng huling demand letter ng abogado ng Xinchuang Network Technologies Inc. na si Ananias Christian Vargas kung saan binigyan ang mga pulis ng 24 oras para lisanin ang POGO Hub.
Una nang ipinaliwanag ng PNP na isinasagawa ang dokumentasyon ng mga naligtas na umano’y biktima ng “human trafficking” sa mismong compound ng POGO dahil hindi magkakakasya sa himpilan ng pulisya ang malaking bilang ng mga kailangang isailalim sa dokumentasyon.
Sinabi ni Maranan na hindi nila kakayanin na tapusin sa loob ng naturang deadline ang dokumentasyon, pero pauuwiin din nila ang mga nasagip kapag tapos na. | ulat ni Leo Sarne
