Nakatanggap ng pagbabanta ang asawa ng tumatakbong Punong Barangay sa Vicente Hizon, Davao City kaninang umaga, kasabay ng pagbubukas ng botohan sa Barangay at Sangguniang Kabataan Elections (BSKE).
Sa report ng Davao City Police Office, inilahad dito na nakatanggap ng isang package ang asawa ni Punong Barangay aspirant Ralph Abella na si incumbent Second District Councilor Marissa Salvador-Abella bandang alas 7 kaninang umaga.
Nang buksan ito, tumambad ang duguan na tatlong piraso ng bulaklak na may isang bala ng 9mm kung saan may kasama itong sulat na nakasaad na kung gusto nitong mailigtas ang mga anak ng mag-asawa kinakailangan na itigil ni Abella ang pagsasampa ng kaso.
Kasalukuyan namang iniimbestigahan ng Sasa Police Station kung saan at kanino nanggaling ang nasabing package.| ulat ni Armando Fenequito| RP1 Davao
