Hinikayat ni Deputy Speaker at Cebu 5th district Rep. Duke Frasco na maisama sa mga popondohan sa 2025 National Budget ang firefighting helicopters.
Sa kaniyang House Resolution 1686, pinasasama nito sa Bureau of Fire Protection at DILG sa kanilang 2025 National Expenditure Program proposal ang pagbili ng firefighting helicopters upang mas mabilis na makaresponde sa mga sunog.
Lubha kasing ikinababahala ng mambabatas na sa unang dalawang buwan pa lang ng 2024 ay umabot na sa 25% ang insidente ng sunog sa buong bansa.
Punto pa ng kinatawan, na isa sa nagiging problema sa pagresponde sa sunog lalo na sa mga densely populated na residential area ay ang traffic congestion at maliliit na kalsada.
Kaya naman naniniwala si Frasco, na mas magiging maayos at mabilis ang pagresponde ng BFP sa sunog kung ma-upgrade ang kanilang mga kagamitan.
Bahagi na rin aniya ang pagbili ng firefighting helicopters ng BFP Modernization Program. | ulat ni Kathleen Forbes
