Target ng pamahalaan na magkaroon ng direct flights mula Brunei patungo sa iba’t ibang tourist destination ng Pilipinas.
Sa ambush interview kay Tourism Secretary Maria Christina Frasco sa Brunei, inihayag nitong sisikapin nilang magkaroon ng flight diretso na ng Cebu at Clark gayung sa ganitong paraan ay mas marami pang maaaring mahikayat na mga turista ang bumisita sa bansa.
Binigyang diin ni Frasco, na mahalaga ang nasabing connectivity goal gayung hindi lang sa Manila ang diretso ng mga turista kung hindi rekta na din sa mga tourism destination gaya ng Cebu at Clark.
Maisasakatuparan ito ani Frasco sa pamamagitan ng pakikipag-ugnayan ng Department of Tourism (DOT) at Department of Transportation (DOTr) para sa route development, at mula dito ay magkaroon ng negosasyon at madadagdagan ang flight destinations sa labas ng NCR.
Kaugnay nito ay nagpasalamat naman si Frasco kay Pangulong Ferdinand R. Marcos Jr. para sa suporta nitong mapalawak pa ang turismo sa bansa. | ulat ni Alvin Baltazar
