Photo courtesy of National Commission for Culture and the Arts
Pormal nang binuksan ng National Commission for Culture and the Arts (NCCA) ang pagtanggap ng mga nominasyon para sa Gawad sa Manlilikha ng Bayan (GAMABA) o mas kilala bilang National Living Treasures Award.
Layunin ng kampanyang ito na kilalanin at parangalan ang mga natatanging katutubo at tradisyonal na alagad ng sining sa buong bansa na patuloy na nag-iingat at nagpapasa ng kanilang kasanayan sa mga susunod na henerasyon.
Sinimulan ang pambansang paglulunsad ng nominasyon sa pamamagitan ng serye ng mga press conference sa mga pangunahing rehiyon ng bansa.
Unang ginanap ang pagbubukas sa University of the Philippines Baguio noong Oktubre 1, 2026, na dinaluhan ng mga kasalukuyang Manlilikha ng Bayan na sina Teofilo Garcia, Amparo Mabanag, at Adelita Bagcal. Sinundan ito ng paglulunsad sa University of the Philippines Visayas sa Lungsod ng Iloilo noong Oktubre 6, at nagtapos sa Lungsod ng Davao sa Mindanao.
Upang mahirang na Manlilikha ng Bayan sa ilalim ng Republic Act No. 7355 o Manlilikha ng Bayan Act, ang isang indibidwal o grupo ay kailangang makatugon sa mahigpit na mga pamantayan na itinakda ng NCCA.
Narito ang mga pangunahing kwalipikasyon sa paghahanap ng mga gagawaran:
- Dapat ay Pilipino at bahagi ng isang katutubo o tradisyonal na komunidad na nagpapanatili ng sariling kultura at tradisyon.
- Nakikibahagi sa isang tradisyonal na sining na umiiral na sa loob ng hindi bababa sa 50 taon.
- Patuloy na lumilikha o nagtatanghal ng mga gawang may pambihirang kalidad at mataas na teknikal na kasanayan.
- May lubos na kasanayan at pagkadalubhasa sa mga materyales at kasangkapang ginagamit sa sining.
- Nagtuturo o nagpapasa ng kasanayan sa ibang miyembro ng komunidad upang hindi mamatay ang tradisyon.
- Nagtataglay ng integridad at iginagalang sa kaniyang komunidad.
Kabilang dito ang katutubong arkitektura, transportasyong pandagat, paghahabi, paglililok, sining ng pagtatanghal, panitikan, sining biswal, paggawa ng palamuti, pagpapalayok, at iba pang tradisyonal na sining.
Ayon kay NCCA Commissioner Reden S. Ulo, pinuno ng Subcommission on Cultural Communities and Traditional Arts, mahalaga ang pagkilalang ito upang matiyak na hindi maglalaho ang mayamang kultura at katutubong kaalaman ng Pilipinas.
Tatagal ang pagtanggap ng mga nominasyon hanggang sa Disyembre 31, 2026.