Nakatanggap ng pabuya na P30,000 mula sa PNP at P50,000 mula sa LGU ang mangingisda na nagbigay ng impormasyon sa mga awtoridad tungkol sa 20 bloke ng cocaine na lumulutang sa karagatan ng Arteche, Eastern Samar noong nakaraang Biyernes.
Ito’y matapos na marekober ng mga awtoridad ang kontrabando na nagkakahalaga ng P111 million.
Nagpasalamat naman si Police Regional Office 8 Director Police BGen. Reynaldo Pawid sa lokal na komunidad sa kanilang mahalagang kontribusyon sa kampanya laban sa iligal na droga.
Ayon kay Pawid, delikado kung hindi narekober ang naturang bloke-bloke ng cocaine dahil posibleng napasakamay ito ng masasamang loob at may potensyal na makasira ng maraming buhay.
Samantala, una nang sinabi ni PNP Public Information Office Chief Police Col. Jean Fajardo na iniimbestigahan ng PNP ang posibleng paggamit sa Pilipinas ng mga dayuhang sindikato bilang transshipment point ng drogang patungo sa ibang bansa. | ulat ni Leo Sarne