Hindi pa isyu sa ngayon ang pagpunta sa ibang bansa ni Senate minority leader Alan Peter Cayetano at dapat hayaan muna siyang magpahinga mula sa stress at tensyon ayon kay Senador Ping Lacson.
Hiling din ni Lacson ang mabuti para kay Cayetano sa kabila ng kanilang mga hindi pagkakaunawaan.
Ito lalo na kung ang paglalakbay nina Cayetano at ng kanyang asawang si Taguig Mayor Lani Cayetano ay may kinalaman sa kalusugan o health-related.
Nitong Miyerkules ng gabi, kumalat online ang mga larawan ni Cayetano sa Terminal 3 ng Ninoy Aquino International Airport (NAIA), kung saan makikitang nakapila siya para sa isang Singapore Airlines flight.
Matatandaang kasalukuyang iniimbestigahan ng National Bureau of Investigation (NBI) at Office of the Ombudsman si Cayetano kaugnay ng umano’y mga iregularidad sa pagho-host ng Pilipinas sa 2019 Southeast Asian Games, kung saan nagsilbi siyang chairman ng Philippine Southeast Asian Games Organizing Committee (Phisgoc).
Nauna nang nagsumite sina Lacson at ang kanyang tanggapan sa Office of the Ombudsman ng hindi bababa sa 45 case studies na suportado ng mga opisyal na dokumento at naglalahad ng tinawag nilang “systemic anomalies” sa mga flood control infrastructure project sa Taguig City, na political bailiwick ni Cayetano.
Matapos nito, naglunsad ang Office of the Ombudsman ng fact-finding investigation kaugnay ng mga alegasyon sa mga proyekto sa Taguig. | ulat ni Nimfa Asuncion
About the Author
