WTA Photo
Matagumpay na pumasok sa quarterfinals ng doubles tournament ang tambalan nina Filipino tennis star Alex Eala at American legend Venus Williams matapos nilang pabagsakin ang tambalang Alexandra Osborne ng Amerika at Catherine Harrison ng Australia sa unang round, 6-3, 6-4, nitong Miyerkules ng gabi sa Bad Homburg Open sa Germany.
Ito ang kauna-unahang pagkakataon na magkapareha sina Eala at Williams sa isang torneo. Susunod nilang makakaharap ang second-seeded pair na sina Tereza Mihalikova ng Slovakia at Olivia Nicholls ng Great Britain. kapwa nasa No. 29 sa doubles world rankings sina Mihalikova at Nicholls, na umabante matapos talunin ang Chinese duo na sina Xinyu Jiang at Yifan Xu, 6-2, 6-3.
Mga Sorpresa at Dikdikang Labanan sa Unang Round
Naging makulay ang unang yugto ng torneo matapos malaglag ang ilang paborito at top-seeded na mga koponan:
- Pagkakatalsik ng Top Seed: Nagawa nina Andreja Klepac at Nika Radisic ng Slovenia na patalsikin ang top-ranked pair nina Nicole Melichar-Martinez (USA) at Erin Routliffe (New Zealand) sa isang dikit na laban, 6-4, 4-6, 10-2. Makakatapat ng Slovenian pair sina Aldila Sutjiadi (Indonesia) at Vera Zvonareva.
- No. 4 Seed, Laglag Din: Sinuwerte rin ang tambalan nina Tamara Korpatsch (Germany) at Emily Webley-Smith (Great Britain) nang mapatalsik nila ang No. 4 pair na sina Lyudmila Kichenok (Ukraine) at Desirae Krawczyk (USA), 3-6, 7-5, 10-8. Makakalaban nila sa quarterfinals ang Chinese tandem na sina Su-Wei Hsieh at Xinyu Wang.
- No. 3 Seed, Nakaligtas: Hindi naman nagpaubaya ang third seeds na sina Ellen Perez (Australia) at Demi Schuurs (Netherlands) matapos makaligtas laban kina Hao-Ching Chan (Chinese Taipei) at Carla Tauson (Denmark), 6-7 (2), 6-3, 10-6. Haharapin nila sa susunod na round ang mga pambato ng China na sina Qianhui Tang at Shuai Zhang.
Ano ang susunod para kay Alex Eala? Abangan ang kapana-panabik na tapatan ng tambalang Eala-Williams laban sa mas may karanasang duo nina Mihalikova at Nicholls sa quarterfinals!
About the Author
