Nagbabala ang PAGASA Agno River Basin Flood Forecasting and Warning Center sa posibleng pagbaha sa ilang lugar sa Agno River Basin, kasunod ng naitalang pag-ulan sa nakalipas na 24 oras.
Batay sa Flood Bulletin No. 3 na inilabas alas-7:00 ng umaga noong Agosto 8, may 31.33 millimeters na rainfall na naitala hanggang alas-6:00 ng umaga. Mas mababa naman sa 50 millimeters ang inaasahang ulan sa susunod na 24 oras.
Inaasahang magkakaroon ng pagbaha sa Santa Barbara, Calasiao, Dagupan City, at bahagi ng Binmaley. Posible naman ang pagbaha sa Bugallon at bahagi ng Lingayen dahil sa pag-ipon ng tubig-ulan.
May minor flooding din sa ilang lugar sa Agno River Basin at sa mabababang baybaying lugar. Pinapayuhan ng PAGASA ang mga residente at lokal na disaster risk reduction councils na magsagawa ng nararapat na hakbang. Walang naiulat na bilang ng mga nasawi o nasugatan, o halaga ng pinsala sa bulletin.
About the Author
