Mas pinabilis at pinadali na ang pagpaparehistro at pag-renew ng negosyo sa timog bahagi ng bansa matapos pormal na ipatupad ng 63 Local Government Units (LGUs) sa SOCCSKSARGEN at LaMa provinces ng Bangsamoro Autonomous Region in Muslim Mindanao (BARMM) ang Electronic Local Government Unit (eLGU) System ngayong 2026.
Sa ilalim ng direktiba ni Pangulong Ferdinand R. Marcos Jr. na pabilisin ang modernisasyon sa mga serbisyo ng pamahalaan, libreng ipinamamahagi ng Department of Information and Communications Technology (DICT) ang eLGU System. Bahagi ito ng Digital Business One-Stop Shop (eBOSS) upang bawasan ang red tape at maiwasan ang mahahabang pila sa mga pampublikong opisina.
Sakop ng nasabing sistema ang 43 LGU sa SOCCSKSARGEN at 20 LGU sa mga lalawigan ng Lanao del Sur, Maguindanao del Sur, at Maguindanao del Norte (LaMa).
“Kapag mas mabilis ang permit, mas mabilis ang negosyo. Sa pamamagitan ng eLGU, hindi kailangang maubos ang oras ng ating mga negosyante sa paulit-ulit na pagpunta sa mga opisina. Mas marami silang oras para sa kanilang negosyo, kanilang mga empleyado, at kanilang mga customer,” pahayag ni DICT Secretary Henry Aguda.
Pagtaas ng Koleksyon at Tiwala ng Mamumuhunan
Malaki ang naging tulong ng eLGU sa pagpapataas ng pampublikong kita ng mga lokal na pamahalaan:
- Region XII (SOCCSKSARGEN): Mula 2023 hanggang 2025, nakapagproseso ang rehiyon ng 114,259 permits na nakalikom ng humigit-kumulang ₱1.79 bilyon na lokal na revenue.
- LaMa Provinces (BARMM): Umabot sa 7,931 permits ang naproseso na may kabuuang koleksyon na halos ₱77.7 milyon.
- Kabacan, North Cotabato: Tumaas ang business tax collection mula ₱26.32 milyon noong 2019 tungong ₱29.57 milyon noong 2020 matapos lumipat sa digital system.
- Kidapawan City: Umakyat sa ₱102.67 milyon ang koleksyon noong 2022 mula sa ₱83.93 milyon noong 2021 sa ilalim ng lumang manual process.
Ayon kay Lope Quimco, Acting Business Permit and Licensing Officer ng Kidapawan City, tumaas ang kumpiyansa ng mga mamumuhunan dahil sa bilis at transparency ng no-contact policy sa online applications.
Kaginhawaan para sa mga MSME
Bukod sa dagdag-kita ng gobyerno, malaking ginhawa sa oras at pondo ng mga maliliit na negosyante ang digital shift.
Inihayag ni Sharven Doronio, isang negosyante at kinatawan ng DTI mula sa Norala, South Cotabato, na hindi na kailangang mag-isip ng mga tindahan para lamang mag-asikaso ng papeles. Agad ding nakatatanggap ng notification sa portal kung may kulang na mga dokumento tulad ng valid ID.
Patotoo rin ni Mark Noro, isang negosyante mula sa Kidapawan City na tatlong taon nang gumagamit ng sistema, na nakapagbabayad na siya kahit weekend o nasa bahay lamang gamit ang internet at mga online payment channels tulad ng Landbank.
Sa pakikipagtulungan ng DICT sa Department of the Interior and Local Government (DILG) Region XII at Anti-Red Tape Authority (ARTA), patuloy ang pagsasanay at technical support upang mas marami pang LGU ang makalipat sa digital governance.
About the Author
