Nagbigay ang provincial government ng Davao de Oro ng kabuuang ₱3 million na financial assistance sa Sarangani at Davao Occidental para makatulong sa mga naapektuhan ng magnitude 7.8 na lindol noong June 8.
Pormal na iniabot nitong September 2, 2026 ang tig-₱1.5 million na tulong sa dalawang lalawigan mula sa Quick Response Fund o QRF ng Davao de Oro.
Ipinag-utos ni Davao de Oro Governor Raul Mabanglo ang paglalaan ng pondo para sa mga kalapit na lalawigang naapektuhan ng lindol, na kalaunan ay inaprubahan ng provincial council.
Sa Sarangani, personal na tinanggap ni Governor Rogelio Pacquiao kasama ang iba pang provincial officials ang ₱1.5 million na tulong.
Samantalang tinanggap naman ni Provincial Disaster Risk Reduction and Management Office Head Harry Chester Camoro ang kaparehong halaga para sa Davao Occidental bilang representative ni Governor Atty. Franklin Bautista.
Ayon sa Davao de Oro provincial government, layunin ng tulong na suportahan ang patuloy na pagtugon sa pangangailangan ng mga komunidad na naapektuhan ng lindol.
Nagpasalamat naman ang mga opisyal ng Sarangani at Davao Occidental sa tulong, na anila’y nagpapakita ng pagkakaisa ng mga lalawigan sa Mindanao sa panahon ng kalamidad.
📷 Davao de Oro PLGU
About the Author
