Upang tiyakin ang kaligtasan at kaayusan ng mga paaralan sa buong lalawigan, matagumpay na isinagawa ng Eastern Samar Police Provincial Office (ESPPO) ang isang malawakang Orientation Seminar on School Safety and Security para sa mga school watchmen at security guards nitong Setyembre 3, 2026 sa Eastern Samar Provincial Capitol Conference Room, Brgy. Alang-alang, Borongan City.
Sa ilalim ng pamumuno ni P/Col. Orlando Gardiola Jr., officer-in-charge ng ESPPO, at sa pamamagitan ng Provincial Community Affairs and Development Unit (PCADU) sa pamumuno ni PMAJ Aldwin Ballete, pormal na pinagsama-sama ang mga opisyal ng seguridad mula sa pampubliko at pampribadong sekondaryang paaralan sa buong Eastern Samar.
Layunin ng naturang pagsasanay na patatagin ang kanilang kakayahan bilang pangunahing kaagapay at unang hanay ng pagtatanggol (first line of defense) sa pagpapanatili ng kapayapaan sa loob ng mga campus.
Sumailalim ang mga kalahok sa serye ng pagsasanay na naglalayong magbigay ng praktikal at mabilis na pagtugon sa mga banta at sakuna, kabilang na ang pagsasanay ukol sa child protection, anti-bullying, lawful arrest procedures, at ang pagpapatupad ng Anti-Bomb Joke Law, pagtalakay sa nihilistic violent extremism awareness, pangkalahatang school security protocols, at tamang disiplina sa radio communication; mga angkop na tungkulin ng isang first responder at pagsasanay sa basic first aid.
Binigyang-diin ng ESPPO na ang hakbang na ito ay bahagi ng kanilang patuloy na adbokasiya na gawing ligtas, payapa, at malayo sa anumang uri ng karahasan ang mga paaralan, upang matiyak na manatili itong silungan ng kaalaman at magandang kinabukasan para sa bawat mag-aaral.
📸 Eastern Samar Police
About the Author
