PSAC, muling ipinapanawagan ang paglikha ng Department of Water Resources

Eph Gaytos September 12, 2026 2 minutes read

Muling itinulak ng Private Sector Advisory Council (PSAC) ang pagtatatag ng Department of Water Resources (DWR) upang pag-isahin ang mga hakbang ng pamahalaan laban sa pagbaha, tagtuyot, at mga suliranin sa suplay ng tubig sa bansa.

Iniharap ang naturang rekomendasyon kay Pangulong Ferdinand R. Marcos Jr. noong Miyerkules sa ginanap na ika-8 Infrastructure Sector meeting ng PSAC sa Malacañang.

Dito ay nanawagan ang grupo ng mas mabilis at mas pinalakas na koordinasyon upang mapatibay ang kahandaan ng bansa sa mga kalamidad at krisis sa tubig.

“We should not wait for the next earthquake, flood, or drought. We need to act before it happens,” pahayag ni PSAC lead convenor Sabin Aboitiz, pangulo at CEO ng Aboitiz Equity Ventures.

Binigyang-diin ng PSAC na sa usapin ng flood management, kailangang tingnan ang buong water system sa halip na magkaroon ng pira-pirasong proyekto.

Kaugnay nito, inirekomenda ng grupo ang paglinis sa Manggahan Floodway, ang pagpapatuloy ng Parañaque Spillway, at ang pagsuporta sa mga waste-to-energy facility kasabay ng paglikha ng DWR.

Layunin ng panukalang DWR na wakasan ang nahahating pamamahala sa pambansang yamang-tubig na sa kasalukuyan ay nakahati sa iba’t ibang ahensya tulad ng Metropolitan Waterworks and Sewerage System (MWSS), Local Water Utilities Administration (LWUA), National Irrigation Administration (NIA), National Water Resources Board (NWRB), Department of Public Works and Highways (DPWH), at Department of Environment and Natural Resources (DENR).

Bagama’t matagal nang isinusulong ng mga nakaraang administrasyon, kasalukuyang nakatayo ang Water Resources Management Office sa ilalim ng DENR sa pamamagitan ng Executive Order 22 bilang pansamantalang mekanismo habang hinihintay ang opisyal na pagtatag ng DWR.

Nananatili itong prayoridad na panukalang batas ng administrasyong Marcos para sa ika-20 Kongreso.

Ginawa ring halimbawa ng PSAC ang naging karanasan ng Metro Manila sa tagtuyot noong 2026 upang ipakita ang kahalagahan ng maagang paghahanda at pagpaplano sa krisis.