Photo courtesy of the Provincial Government of Davao Oriental
Mahigit ₱62 milyon halaga ng tulong, livelihood support, training, productive assets at social services ang naipamahagi sa mga benepisyaryo sa Davao Oriental nitong Setyembre 14 bilang bahagi ng “Handog ng Pangulo: Serbisyong Sapat Para sa Lahat” na isinagawa sa Provincial Capitol Covered Court.
Sa pahayag ng pamahalaang lokal ng Davao Oriental, ilan sa mga benepisyaryong nakatanggap ng nasabing serbisyo ay mga magsasaka, mangingisda, manggagawa, estudyante, mahihirap na pamilya at mga livelihood groups.
Pinangunahan ang programa ni Agriculture Secretary Francisco Tiu Laurel Jr. kasama sina Davao Oriental Governor Nelson Dayanghirang, Vice Governor Glenda Monette Rabat-Gayta, First District Representative Nelson Dayanghirang Jr., at Second District Representative Cheeno Miguel Almario.
Kabilang sa mga ipinamahaging tulong ang livelihood at financial assistance, crop insurance, farm machinery, irrigation support, TESDA scholarships at starter toolkits, mga punla para sa reforestation, emergency shelter assistance, assistive devices, medical aid, at pre-licensing training para sa mga nais maging security guard.
Malalaking productive assets naman sa sektor ng agrikultura at pangisdaan ang kinabibilangan ng 77.09-foot steel-hull fishing vessel, motorized fiberglass boats, HDPE fish cage livelihood packages, fishing gear, 35,000 tilapia fingerlings, Red Tilapia Technology Demonstration Project, at iba’t ibang farm tools at machinery.
Sa ilalim ng TESDA, 19 trainees ang sumailalim sa Bookkeeping NC II, 25 sa Early Childhood Care and Development NC III, at 25 sa Massage Therapy NC II. Limang benepisyaryo naman ang nakatanggap ng starter toolkits.
Samantala, 495 benepisyaryo ang nakatanggap ng financial assistance mula sa DSWD, habang 41 kalahok naman ang sumailalim sa pre-licensing training para sa security guards.
Nagbigay rin ang Provincial Social Welfare and Development Office ng emergency shelter assistance sa isang residenteng naapektuhan ng sunog sa Boston at 11 assistive devices sa Mati, kabilang ang wheelchairs, crutches at quad canes.
Sa ilalim naman ng OWWA XI, 10 benepisyaryo ang nakatanggap ng livelihood assistance sa pamamagitan ng Balik Pinas! Balik Hanapbuhay! Program, kasama ang medical assistance sa ilalim ng Welfare Assistance Program.
Bukod sa mahigit ₱62 milyong tulong na ipinamahagi sa aktibidad, sinabi na ang DA family na binubuo ng DA RFO 11, PhilMech, PCIC, BFAR 11 at PFDA ay may mahigit ₱400 milyon na mas malawak na agriculture at fishery development initiatives para sa Davao Oriental.
📸 Provincial Government of Davao Oriental
About the Author
