Posibleng mapaaga ang pagsusumite ng House prosecution panel ng formal offer of evidence laban kay Vice President Sara Duterte upang mapabilis ang paglilitis sa impeachment case nito sa Senado.
Ayon kay House prosecutor at Manila 3rd District Representative Joel Chua, inihahanda na nila ang pagsusumite matapos pormal na tapusin ng prosekusyon ang paglalahad ng kaso noong Oktubre 13.
May hanggang Oktubre 23 ang prosekusyon upang isumite ang mga dokumento at iba pang ebidensiyang susuporta sa Article II ng impeachment complaint na may kaugnayan sa umano’y hindi maipaliwanag na yaman ng Bise Presidente.
Sa testimonya ng kanilang huling saksi na si forensic accounting expert Alexander Cabrera, tinatayang aabot sa ₱817.87 milyon ang umano’y hindi maipaliwanag na yaman nina Duterte at ng kaniyang asawang si Atty. Manases Carpio mula 2022 hanggang 2025.
Gayunman, itinanggi ni Duterte ang mga paratang, habang kinukuwestiyon naman ng kaniyang defense team ang mga alegasyon laban sa kaniya.
Ayon kay Chua, inaasahang bibilis ang paglilitis ngayong Article II na lamang ang natitirang usapin matapos tanggapin ng impeachment court ang pag-atras ng prosekusyon sa tatlo pang impeachment articles.
Nakatakdang magpatuloy ang paglilitis sa Nobyembre 9, kung kailan inaasahang sisimulan ng defense team ni Duterte ang paglalahad ng kanilang mga ebidensiya, alinsunod sa mga magiging pasya ng impeachment court.
About the Author
