Pagsulong ni PBBM sa paggamit ng renewable energy, suportado ng isang mambabatas

Kathleen Forbes July 29, 2026 1 minute read

Nagpahayag ng suporta si Ako Bicol Party-list Rep. Jan Almario Chan sa pagtutok ng administrasyon sa renewable energy, kasunod ng ikalimang State of the Nation Address (SONA) ni Pangulong Ferdinand R. Marcos Jr.

Ayon kay Chan, mahalagang mapabilis ang paglipat ng bansa sa mas malinis, mas abot-kaya at sustainable na pinagkukunan ng enerhiya upang matiyak ang pangmatagalang suplay ng kuryente.

Suportado rin niya ang panawagan ng Pangulo na maipasa ang Sariling Kuryente Act, na magpapadali sa paglalagay ng solar panels at battery storage systems sa mga tahanan.

Aniya, makatutulong ang panukalang batas upang mas maraming pamilyang Pilipino ang makagamit ng malinis na enerhiya at mabawasan ang kanilang buwanang bayarin sa kuryente.

Binigyang-diin ng mambabatas na mahalaga ring mapalakas ang energy security ng bansa sa pamamagitan ng mas malawak na paggamit ng renewable energy.

Hindi naman aniya dapat manatili sa mga pangako ang mga inisyatibong ito kung hindi maisabatas at maipatupad sa lalong madaling panahon.