Humingi na ng saklolo sa Supreme Court (SC) ang mga grupo ng manggagawa upang agad na resolbahin ang kanilang petisyon laban sa kautusan ng Pasig Regional Trial Court (RTC) na nagpapatigil sa pagpapatupad ng dagdag-sahod sa National Capital Region (NCR).
Kasunod ito ng pinalabas na preliminary injunction ng Pasig RTC Branch 152 noong Agosto 13, 2026, na pansamantalang humaharang sa NCR Wage Order No. 27. Dahil dito, naghain ng manifestation na may kasamang urgent motion ang mga grupo ng manggagawa sa Kataas-taasang Hukuman upang ituring na “supervening event” ang desisyon ng mababang hukuman na nangangailangan ng mabilisang aksyon.
Naglabas ang Pasig RTC ng ₱10 bilyong bond at pinalawig ang pagpapatigil sa wage hike habang nakabinbin pa ang petisyon para sa declaratory relief na inihain ng mga employer.
Paglabag sa Due Process at Ekwidad
Ayon sa mga grupo ng manggagawa, ipinapakita ng nasabing preliminary injunction ang mismong usapin sa hurisdiksyon na dapat linawin ng Kataas-taasang Hukuman. Binigyang-diin din ng mga petitioner na hindi man lang dininig ng mababang hukuman ang panig ng mga manggagawa bago ipinasa ang paborableng utos para sa mga negosyante.
“Due process required that workers be heard on what it means not to receive it,” pahayag ng mga grupo ng manggagawa sa kanilang habla.
Usapin ng Hurisdiksyon
Pangunahing punto ng mga grupo kung may legal na kapangyarihan ba ang RTC na gumamit ng pangkalahatang alituntunin sa injunction laban sa isang wage order na binuo sa ilalim ng Republic Act No. 6727 (Wage Rationalization Act).
- Apela sa NWPC: Ipinaalala ng mga grupo na ayon sa Labor Code, ang anumang apela laban sa wage order ay dapat idulog sa National Wages and Productivity Commission (NWPC) at hindi sa mga lokal na hukuman.
- Bawal ang Injunction: May malinaw na limitasyon ang batas sa paglalabas ng mga restraining order sa mga usaping hawak ng mga regional wage board at ng NWPC.
- Limitasyon ng Rule 58: Iginiit ng mga manggagawa na hindi pwedeng gamitin ang Rule 58 ng Rules of Court upang magkaroon ng hurisdiksyon ang RTC sa isang usaping itinatakda ng isang espesyal na batas, at hindi dapat umarte ang korte bilang kapalit ng wage board.
Dahil sa lalong lumalalang gulo sa legalidad ng dagdag-sahod, hiniling din ng mga grupo sa Supreme Court na maglabas ng malinaw na gabay para sa mga mababang hukuman, manggagawa, employer, regional wage boards, at NWPC ukol sa tamang proseso at sakop ng judicial review sa mga regional wage order.
About the Author
