P300K equipment aid ng DAR, inaasahang magpataas ng kita ng 152 magsasaka sa Ifugao

Inaasahang tataas ang kita at produksyon ng humigit-kumulang 152 magsasaka na miyembro ng Agrarian Reform Beneficiary Organization (ARBO) sa lalawigang ito matapos makumpleto ng Department of Agrarian Reform (DAR) ang pamamahagi ng P300,000 halaga ng mga makinaryang pangkabuhayan.

Ayon kay Alona Padilla, Agrarian Reform Program Officer II ng DAR-Alfonso Lista field office, malaki ang maitutulong ng mekanisasyon sa mga magsasaka upang mapabilis ang kanilang pagtatanim at pag-aani.

“Mabilis na masasakop ng mga makabagong makinaryang ito ang mas malawak na lupain kumpara sa manu-manong paggawa. Nagbibigay ito ng pagkakataon para sa napapanahong pagtatanim at pag-aani, na nagreresulta sa mas mataas na ani at field capacity,” pahayag ni Padilla.

Aniya, ang mekanisasyong ito ay magbibigay-daan sa Posnaan ARBO na lumipat sa mas matipid at episyenteng operasyon, bawasan ang gastos sa produksyon, at palakasin ang pangkalahatang lebel ng pagiging produktibo.

Sa ilalim ng Enhanced Partnership Against Hunger and Poverty (EPAHP) Program ng DAR, naisakatuparan ang ikalawa at huling bahagi ng pamamahagi noong Agosto 5 kung saan naipagkaloob ang isang crawler at isang power tiller. Ang unang tranche naman na naipasa noong Pebrero 25 ay kinabibilangan ng:

2 rotavator
10 knapsack sprayer
5 brush cutter
2 water pump

Ang Posnaan ARB Inc. ay isang bagong tatag na organisasyon na nagsasaka ng humigit-kumulang 103.20 ektaryang lupain. Pangunahing itinatanim ng grupo ang mais at iba’t ibang uri ng gulay tulad ng kamatis, talong, okra, ampalaya, sitaw, kalabasa, pipino, at pechay para sa pangkomersyal na bentahan.

Nagpahayag naman ng labis na pasasalamat si Salina Ayongchi, Pangulo ng Posnaan ARB Inc., sa suportang natanggap mula sa pamahalaan.

“Nagpapasalamat kami sa DAR para sa tulong na ito. Sisiguraduhin naming magagamit nang maayos ang mga kagamitan at magtutulungan ang aming mga miyembro upang mapalago ang aming negosyo,” sabi ni Ayongchi.

Nagkaroon din ng paglagda sa isang trust agreement ang organisasyon bilang pagpapatibay sa kanilang kompromiso na pangangalagaan ang mga natanggap na kagamitan.

Ayon naman kay Lunecia Segundo, DAR-Ifugao Provincial Agrarian Reform Officer, bukod sa paggawa ng mga souvenir item, bukas din ang pagkakataon para sa Posnaan na palawakin ang merkado ng kanilang mga produktong agrikultural sa tulong ng mga institutional buyer sa ilalim ng PAHP program.

Ang proyektong ito ay alinsunod sa direktiba ni DAR Secretary Conrado Estrella III na palakasin ang mga serbisyong pangkabuhayan para sa mga agrarian reform beneficiary upang maging tuloy-tuloy at matatag ang kanilang mapagkukunan ng kita.