Photo courtesy of Cybercrime Investigation and Coordinating Center (CICC)
Pinaigting ng Cybercrime Investigation and Coordinating Center (CICC) ang kanilang online monitoring operations laban sa fake news, maling impormasyon, at disinformation bago ang kauna-unahang Parliamentary Elections sa Bangsamoro Autonomous Region in Muslim Mindanao (BARMM).
Pinangungunahan ang mas pinaigting na pagmamanman ng Threat Monitoring Center (TMC) ng CICC, ang intelligence arm nito na nagsasagawa ng 24-oras na digital surveillance, sa pakikipag-ugnayan sa Commission on Elections (COMELEC) at Presidential Task Force on Media Security (PTFOMS).
Isinagawa ang magkasanib na inisyatibang ito matapos tukuyin ng COMELEC ang misinformation at disinformation bilang ilan sa pinakamalalaking hamon sa halalan sa BARMM.
Nakatuon ang operasyon sa pagtukoy at pagtugon sa mga election-related content na maaaring makapanlinlang sa mga botante o makasira sa integridad ng proseso ng halalan.
Ayon kay CICC Executive Director Undersecretary Renato “Aboy” Paraiso nitong Sabado, mananatili ang mahigpit na pagmamanman hanggang sa matapos ang halalan bilang bahagi ng pangako ng pamahalaan na panatilihing ligtas ang online environment mula sa maling impormasyon at iba pang aktibidad na maaaring makapanlinlang sa mga botante at makasira sa proseso ng halalan.
“Mahalaga ang halalang ito sa kinabukasan ng Bangsamoro at sa patuloy na pag-unlad ng rehiyon, kaya dapat nating protektahan ang proseso ng halalan laban sa anumang maaaring makasira sa integridad nito, kabilang ang mga mapaminsalang aktibidad online,” pahayag ni Paraiso.
“Dapat mag-isip nang dalawang beses ang mga nagtatago sa likod ng anonymity ng social media. Hindi magiging pananggalang ang anonymity sa sinumang lalabag sa mga batas sa halalan. Tutukuyin namin ang mga lumabag, titipunin ang mga ebidensya, at papanagutin sila alinsunod sa COMELEC Resolution No. 1164,” dagdag niya.
Bilang bahagi ng operasyon, mahigpit na susubaybayan ng TMC ang mga ulat hinggil sa vote-buying, at layunin nitong maaksyunan ang mga naturang ulat sa loob ng isang oras.
Gagamit din ito ng mga software tool upang matukoy sa loob lamang ng ilang minuto ang mapanlinlang na content na ginawa gamit ang artificial intelligence (AI), at i-flag ang disinformation para maipasa sa mga kaukulang online platform para sa pagtanggal.
Nakipagtulungan din ang mga pangunahing technology platform, kabilang ang Meta, Google, TikTok, at X, upang tulungan ang CICC sa pagtugon sa mga problematikong content at pagpapadali sa pagtanggal ng mga digital material na napag-alamang naglalaman ng mali o hindi tumpak na impormasyon, alinsunod sa kanilang mga umiiral na polisiya at pamamaraan.
Sa pagtanggap ng mga ulat, gagamit ang CICC ng mga kaukulang monitoring at verification tool upang tiyakin ang katumpakan ng mga na-flag na post at matukoy kung ang mga ito ay lumalabag sa mga tuntunin ng halalan o sa iba pang umiiral na batas.
Source: CICC
About the Author
