Sa gitna ng pabago-bagong kalagayan ng pandaigdigang ekonomiya, pinagtibay ng mga economic minister ng ASEAN ang mga hakbang upang higit pang palakasin ang kalakalan, pamumuhunan, at digital economy sa rehiyon sa ginanap na 58th ASEAN Economic Ministers’ Meeting sa Maynila.
Sa joint media statement, iniulat na lumago ng 4.9% ang ekonomiya ng ASEAN noong 2025, habang inaasahang mananatiling matatag ang paglago nito sa 4.5% ngayong 2026. Umabot din sa USD 4.4 trilyon ang kabuuang merchandise trade ng rehiyon, habang pumalo sa USD 245.7 bilyon ang foreign direct investment, patunay ng patuloy na kumpiyansa ng mga mamumuhunan sa ASEAN.
Pinagtibay rin ng mga ministro ang pagpapatupad ng ASEAN Economic Community Strategic Plan 2026-2030, kabilang ang pagpapalawak ng digital economy, pagpapalakas ng supply chains, modernisasyon ng ASEAN Trade in Goods Agreement (ATIGA), at paghahanda sa paglagda ng ASEAN Digital Economy Framework Agreement (DEFA) sa nalalapit na ASEAN Summit.
Samantala, muling iginiit ng ASEAN ang layunin nitong palawakin ang ugnayang pangkalakalan sa mga partner countries, isulong ang pagpapalawak ng RCEP, at suportahan ang patuloy na integrasyon ng Timor-Leste bilang ika-11 miyembro ng samahan.
Sa kabuuan, inaasahang magsisilbing gabay ang mga napagkasunduan sa pagpapatatag ng ekonomiya ng ASEAN at sa paglikha ng mas inklusibo, matatag, at makabagong rehiyonal na merkado sa mga susunod na taon.
About the Author
