Nanawagan ang Council for the Welfare of Children (CWC) ng mas responsable at sensitibong pamamahayag, at pakikitungo sa mga batang artista.
Ito’y matapos mag-viral ang isang film press conference kung saan tinanong ang 12-anyos na aktor na si Kanye Avendaño tungkol sa posibleng pagsali nito sa adult-oriented entertainment.
Agad naman itong pinalagan ng kasamahang aktor at dati ring child star na si Zaijian Jaranilla, at nagpaalala sa media na mag-ingat sa mga ibinabatong tanong kay Avendaño dahil menor de edad pa ito.
Ayon kay CWC Executive Director Usec. Angelo Tapales, hindi dapat maisantabi ang karapatan, dignidad, kaligtasan at kapakanan ng mga bata dahil lamang sa kanilang pagiging artista.
“Being in the public eye does not make them any less deserving of respect, protection, and age-appropriate treatment. We call on media practitioners and entertainment professionals to exercise greater sensitivity and responsibility in their engagements with young performers,” ani Usec. Tapales sa isang pahayag.
Hinikayat din nito ang mga mamamahayag, content creator at event organizer na maghanda ng mga tanong na angkop sa edad ng mga bata at tiyaking hindi sila napipilitan o napapahiya sa mga panayam.
“Every question asked and every platform provided should uphold a child’s dignity, protect their well-being, and respect their best interests. The responsibility to protect children does not end when the cameras start rolling,” dagdag pa ni Tapales.
Para sa mga usaping may kinalaman sa proteksiyon ng mga bata, maaaring makipag-ugnayan alinman sa mga sumusunod na platform:
1. Tumawag sa MAKABATA Helpline 1383
2. Mag-text sa 0919-354-1383 (Smart) at 0915-802-2375 (Globe)
3. Mag-message sa MAKABATA Helpline 1383 Facebook at Instagram
4. Mag-email sa makabatahelpline@cwc.gov.ph
5. Mag-report sa eGov Super App sa pamamagitan ng pagpili sa “Child Abuse”
About the Author
