Pormal nang inaprubahan ng Land Transportation Franchising and Regulatory Board (LTFRB) ang paggawad ng special permits sa 20 karagdagang bus na magsisilbing direktang alternatibong transportasyon para sa libu-libong pasahero ng Light Rail Transit Line 2 (LRT-2).
Ang hakbang na ito ay tugon ng pamahalaan sa mabigat na siksikan at mahahabang pila sa mga istasyon, partikular na sa tuwing sumasapit ang rush hour sa umaga at hapon.
Sa ilalim ng nasabing programa ng pamahalaan para sa LRT-2 bus augmentation:
Antipolo – Legarda Route (10 Bus): Sampung yunit ang nakatalagang bumaybay mula sa LRT-2 Antipolo Station (Masinag) patungong Legarda, Manila.
Dadaan ang mga bus na ito sa Marcos Highway, E. Rodriguez Sr. Avenue, at España Boulevard.
Malaki ang maitutulong nito sa mga estudyante at manggagawang patungo sa University Belt at mga pangunahing ospital sa lugar gaya ng St. Luke’s Medical Center – Quezon City, De Los Santos Medical Center, at National Children’s Hospital.
Antipolo – Cubao Route (10 Bus): Sampu rin ang nakatalaga para sa rutang magdurugtong sa Antipolo patungong Cubao, Quezon City sa pamamagitan ng Marcos Highway at P. Tuazon Boulevard. Ang rutang ito ay nagbibigay din ng mas madaling akses o paglipat patungo sa EDSA Busway at MRT-3.
Ayon sa Department of Transportation (DOTr) at LTFRB, tinatayang nasa 4,000 pasahero ang hindi nakasasakay o naiiwang pumipila tuwing peak hours (6:00 AM hanggang 8:00 AM) sa LRT-2.
Dahil dito, malaking ginhawa ang hatid ng mga alternatibong bus na may kapasidad na umabot sa 70 pasahero bawat yunit.
Bilang karagdagang tulong sa mga commuter, nakipagkasundo rin ang pamahalaan upang magbigay ng 20% diskwento sa pasahe — kung saan magiging ₱66 na lamang ang regular na pamasahe (mula sa dating ₱80) at ₱55 naman para sa mga mag-aaral.
Ayon sa pamunuan, habang aabutin pa ng tatlo hanggang apat na taon ang pagbili at pagdating ng mga bagong tren para sa mas permanenteng solusyon, patuloy na palalakasin ng LTFRB at DOTr ang mga hakbang sa kalsada. Maaari ring madagdagan ang bilang ng mga augmentation bus units sa mga susunod na araw batay sa aktwal na pangangailangan at dami ng mga pasahero.
About the Author
