Naglaan ng eksklusibong 10,000-square-meter na pasilidad para sa Bureau of Customs (BOC) sa loob ng Mindanao Container Terminal sa Tagoloan, Misamis Oriental matapos lumagda sa isang Memorandum of Agreement ang BOC, PHIVIDEC Industrial Authority, at Mindanao International Container Terminal Services, Inc.
Nilagdaan ang kasunduan nina Bureau of Customs Commissioner Ariel Nepomuceno, PHIVIDEC Industrial Authority Administrator at Chief Executive Officer Atty. Joseph Donato Bernedo, at Mindanao International Container Terminal Services, Inc. President and General Manager Aurelio Garcia.
Layunin ng kasunduan na palakasin ang Customs operations at pagbutihin ang episyensya ng mga pantalan sa Northern Mindanao alinsunod sa direktiba ni Pangulong Ferdinand R. Marcos Jr.
Gagamitin ng BOC ang inilaan na lugar para sa pansamantalang imbakan, pagsusuri, kustodiya, at pag-iingat ng mga nakumpiskang container, sasakyan at iba pang hindi mapanganib na kalakal.
Magsisilbi rin itong staging area para sa mga enforcement operation ng ahensya upang mas mapabilis ang pagpapatupad ng Customs laws at regulations.
Ayon sa BOC, makatutulong ang pasilidad upang mabawasan ang pagsisikip sa pantalan, mapabilis ang pagproseso ng mga kaso at mapalakas ang koordinasyon ng mga stakeholder sa operasyon ng Mindanao Container Terminal.
About the Author
