Ligtas nang nakabalik sa Pilipinas madaling-araw nitong Linggo ang 24 na Pilipinong binihag at nakulong ng halos siyam na buwan sa Russia, matapos na mismong si Pangulong Ferdinand R. Marcos Jr. ang nakiusap kay Russian President Vladimir Putin sa kanilang bilateral meeting sa Kazan.
Sinalubong nina Foreign Affairs Secretary Maria Theresa Lazaro at Migrant Workers Secretary Hans Cacdac ang mga repatriated na Pilipino sa Ninoy Aquino International Airport (NAIA) Terminal 1. Dumating ang mga ito sa dalawang magkahiwalay na batch mula sa Bangkok, Thailand.
Unang lumapag ang anim na Pilipino pagkalipas lang ng hatinggabi lulan ng Philippine Airlines Flight PR737, habang ang natitirang 18 naman ay dumating nitong umaga ng Linggo gamit ang PAL Flight PR733.
Ayon sa Department of Foreign Affairs (DFA), naging matagumpay ang repatriation sa pakikipagtulungan ng mga awtoridad sa Russia, katuwang ang Department of Migrant Workers (DMW) at ang Overseas Workers Welfare Administration (OWWA).
Una nang inihayag ng Pangulo nitong nakaraang linggo ang nalalapit na pag-uwi ng mga Pinoy matapos niyang talakayin ang sitwasyon ng mga ito kay Putin sa sidelines ng ASEAN-Russia Commemorative Summit sa Kazan. Nagpaabot din ng pasasalamat si Marcos sa lider at pamahalaan ng Russia sa mabilis na pag-resolba sa isyu.
Matatandaang idiniit ni Marcos na ang mga naturang Pilipino ay nakulong sa lungsod ng Irkutsk sa southeastern Siberia sa loob ng siyam na buwan nang walang pormal na kasong isinasampa laban sa kanila.
Batay sa paunang ulat ng mga opisyal ng Pilipinas, lumalabas na biktima ng illegal recruitment scheme ang mga biktima at hinuli ng mga awtoridad doon dahil sa mga paglabag sa batas sa imigrasyon.
Tiniyak naman ng mga ahensya ng pamahalaan na makatatanggap ng tulong at reintegration support ang mga nagbalik-bayan, habang patuloy pa rin ang imbestigasyon ng mga awtoridad sa iligal na pagrerekrut at pagbiyahe ng mga ito patungong Russia.
About the Author
