Agarang ipinag-utos ni Bureau of Customs (BOC) Commissioner Ariel Nepomuceno ang pamamahagi ng mga kinumpiskang kargamento o forfeited goods upang mabilis na matulungan ang mga Pilipinong apektado ng nagdaang malakas na lindol sa Mindanao.
Inihanda na ng kawanihan ang 12 container ng mga nasabing kalakal na naglalaman ng mga kagamitang medikal para sa mga ospital, mga kahoy at materyales sa konstruksyon para sa mga temporaryong tirahan at pagkumpuni ng mga paaralan, pati na rin mga makinarya para sa paghawan ng mga guho. May kasama rin itong mga kagamitang pambahay upang matulungan ang mga pamilya na muling makapagsimula.
Mabilis na pinoproseso ang paglalabas ng mga naturang gamit bilang bahagi ng mas malawak na responde ng pamahalaan sa kalamidad.
Bayanihan ng mga Daungan sa Bansa
Todo-kayod din ang iba’t ibang distrito ng BOC sa bansa upang maghatid ng ayuda sa mga lokal na komunidad:
- Port of Davao: Sa pamumuno ni District Collector Maita S. Acevedo at sa tulong ng kanilang mga stakeholders, matagumpay na nakapaghatid ng relief goods ang daungan sa may 1,000 pamilya sa tatlong barangay sa Jose Abad Santos, Davao Occidental (Brgy. Malalan, Brgy. Kalbay, at Brgy. Butuan).
- Port of Zamboanga at Sub-Port of Dadiangas: Inilunsad ang “Operation Tulong 2026” sa pamumuno ni District Collector Elenita A. Abaño. Nagtulungan ang mga tauhan ng dalawang daungan upang mag-abot ng pagkain, bottled water, at iba pang pangunahing pangangailangan sa General Santos City at mga kalapit na lugar.
- Port of Cagayan de Oro: Pinangunahan ni District Collector Atty. Manuel O. Zurbito, Jr. ang isang donation campaign mula Hunyo 11 hanggang 17, 2026, para sa rehiyon ng SOCCSKSARGEN. Nangolekta sila ng mga hygiene kit, pagkain, kumot, tolda, at tulong pinansyal.
Nagsasagawa na rin ng kanya-kanyang donation drives ang iba pang malalaking daungan tulad ng NAIA, Port of Manila, MICP, Cebu, Iloilo, Surigao, Batangas, at San Fernando, La Union.
Mula sa Imbakan, Diretso sa Mamamayan
Ayon kay Commissioner Nepomuceno, na dating naglingkod sa Office of Civil Defense (OCD), naging natural na sa kanya na hanapan agad ng paraan kung paano magagamit ang mga nakatagong yaman ng pamahalaan sa oras ng sakuna.
“Nagpapasalamat ako sa ating mga opisyal at kawani ng BOC for their quick response… Instead of letting these forfeited goods sit in our warehouses, we want to make sure they go directly to the families and communities in need of our assistance,” pahayag ni Nepomuceno.
Hinangaan din ng komisyunero ang inisyatiba ng mga kawani na kusang-loob na nag-ambag at bumili ng relief goods gamit ang sariling bulsa. Ayon sa kaniya, isa itong malinaw na patunay na buhay na buhay ang diwa ng malasakit at bayanihan sa loob ng Bureau of Customs.
About the Author
