Nakatakdang magsimula ngayong Lunes, Hulyo 6, ang trial proper sa impeachment case ni Vice President Sara Duterte. Kumpirmado ng House Prosecution Panel na tapos na ang pre‑trial proceedings, hudyat para tuloy‑tuloy na ang pagdinig sa Senado.
Natapos noong Hunyo 25 ang limang araw na pre‑trial conference kung saan namarka ang lahat ng documentary exhibits at naisumite ng magkabilang panig ang kanilang stipulations at manifestations. Ayon kay Lead Prosecutor Rep. Gerville Luistro, malaking hakbang ang pagkumpleto ng pre‑trial para sa pormal na presentasyon ng ebidensya at mga testigo.
Mahigit 4,000 dokumento ang namarka, kabilang ang 2,000 records mula sa Office of the Vice President at 1,100 mula sa Department of Education, karamihan kaugnay ng confidential fund disbursements at alegasyon ng unexplained wealth.
Sa gitna ng political drama, lumulutang ang tanong: may epekto ba ito sa ekonomiya?
Para sa financial analyst na si Jonathan Ravelas, malinaw ang sagot — isa itong political noise, isang disruption, pero hindi pa nakikitang banta sa ekonomiya.
Ayon kay Ravelas, may magagandang economic developments nitong mga nakaraang linggo, at hangga’t hindi lumalawak ang hidwaan, hindi maaantala ang momentum. Ang tunay na panganib, aniya, ay kung tatagal ang proseso.
“Sana huwag magtagal. Mas mabilis na malitis, matapos ang impeachment trial, and we can move forward,” ani Ravelas.
Dagdag pa niya, kung hahaba ang drama, mas lalalim ang pagkakahati ng publiko at mas malaki ang posibilidad na maapektuhan ang business sentiment.
Sa usapin ng investor confidence, naniniwala si Ravelas na hindi ito gaanong maaapektuhan. Maging ang mga rally na naganap, aniya, ay hindi naman nakaistorbo sa galaw ng ekonomiya — traffic lang ang naabala.
Para sa kanya, mas kritikal ang maayos na seguridad at mahinahong pagdinig sa Senado. Kapag naging maayos ang proseso, mas makikita ng international community na gumagana ang rule of law sa bansa.
About the Author
