Bagong Pinoy Indie Films, aabangan sa Cinemalaya 2026

Julienne Calces July 9, 2026 2 minutes read

Masisilayan na muli ang mga bagong pelikula mula sa mga independent filmmaker sa nalalapit na 22nd Cinemalaya Philippine Independent Film Festival, na gaganapin mula August 6, 2026 hanggang August 18, 2026.

Sa temang “Reel Reflections,” bibigyan-diin sa festival ang mga kuwentong sumasalamin sa iba’t ibang realidad at karanasan ng mga Pilipino.

Siyam na full-length films ang napili mula sa 199 na isinumiteng entries upang makipagtagisan para sa prestihiyosong Balanghai Trophy, kabilang ang mga sumusunod:

2 Valid IDs – Ma-an Asuncion-Dagñalan
A.Ni.Mál – Dustin Celestino
Ganggang – JL Burgos
Hand of God – Mark Duane Angos
Kaka sa Yawan – Alpha Habon
Mag-iina – Giancarlo Abrahan at Guelan Varela-Luarca
Status: Rejected – Vahn Leinard Pascual
Tayo Lang ang Nakakaalam – David R. Corpuz
Tirik – May-i Guia Padilla

Samantala, napili mula sa 278 entries ang sumusunod na 10 short-film finalists upang maging bahagi ng festival:

Elenita Elena Elaine – Gabriela Serrano
Honey, My Love, So Sweet – JT Trinidad
Hoy, Hoy, Ingat! – Norvin de los Santos
Kung Paano Kakalas – Joseph Vitali
Para-paraan – Mae Chan Li
Runo! – Lysa Catolico at Jazmine Gin Pateña
Silkscreen – Rey Anthony Villaverde
Sorbetes – Jennissie Gilbuena
The Keeper – Nolan Rae Fabular at TRNZ
The River Flows in Different Places – Lot-lot Hermosura

Bawat full-length finalist ay tatanggap ng dalawang milyong pisong production grant, isang milyon mula sa Cultural Center of the Philippines (CCP) at isang milyong piso mula sa Film Development Council of the Philippines (FDCP), para makatulong sa pagsasakatuparan ng kanilang mga proyekto.

Gaganapin ang mga screening sa Red Carpet Cinemas ng Shangri-La Plaza bilang pangunahing venue, habang makakasama rin ang mga piling Ayala Malls Cinemas at Gateway Cineplex bilang mga partner venue ng festival.

Nakatakda naman ang awarding ceremony sa August 17, 2026, isang araw bago ang pagtatapos ng festival sa August 18, 2026.

Sa loob ng mahigit dalawang dekada, patuloy na nagsisilbing mahalagang entablado ang Cinemalaya para sa mga independent filmmaker sa bansa, na nagbibigay-daan upang mas maraming orihinal at makabuluhang kuwentong Pilipino ang mapanood at makilala ng mas malawak na publiko.