Kamanggagawa solon, kinondena ang pagpapatigil sa Php85 wage hike sa Metro Manila

Kathleen Forbes July 31, 2026 1 minute read

Mariing kinondena ni Kamanggagawa Party-list Representative Elijah San Fernando ang inilabas na “status quo ante order” para pansamantalang ipatigil ang pagpapatupad ng ₱85 dagdag sa minimum wage sa Metro Manila.

Batay sa kautusan ng Pasig City Regional Trial Court Branch 152, hindi muna ipapatupad ang wage hike hanggang August 13 matapos maghain ng petisyon ang Readycon Trading and Construction Corp. at R-II Builders Inc.

Ayon kay San Fernando, labag sa Labor Code ang naturang kautusan ng korte.

Aniya, malinaw sa Article 126 ng Labor Code na walang hukuman, tribunal o iba pang entidad ang maaaring magpalabas ng injunction o temporary restraining order laban sa mga proceedings ng National Wages and Productivity Commission at ng Regional Tripartite Wages and Productivity Boards.

Nakasaad din aniya sa Article 123 ng Labor Code, na ang mga apela kaugnay ng wage order ay dapat idaan sa National Wages and Productivity Commission ng Department of Labor and Employment (DOLE).

Dahil dito, iginiit ng mambabatas na walang hurisdiksyon ang Pasig RTC sa usapin ng wage order at malinaw umanong panghihimasok ito ng hudikatura sa quasi-legislative function ng DOLE.