Inihayag ng House prosecution panel ang kanilang pagkadismaya sa patuloy na pagkaantala ng impeachment trial laban kay VP Sara Duterte dahil sa pagtanggi ng defense team na magkasundo o mag-stipulate ukol sa mga dokumentong ebidensya.
Dahil dito, bumagal ang pagpapakita ng mga rekord kaugnay ng ₱612.5 milyong confidential funds na kasalukuyang sinusuri.
Ayon kay legal spokesperson Atty. Benjamin “Jay” Tolosa Jr., hindi sila magkokomento kung sinasadya ba ang delay o ang mga pagkaantalang ito.
Kasalukuyang inilalahad ng prosecution ang mga financial record, kabilang ang mga acknowledgment receipt, para sa ₱612.5 milyong confidential funds na inilaan sa Office of the Vice President (OVP) at Department of Education (DepEd) noong 2022 at 2023.
Ayon sa prosecution, kung magkakasundo o magso-stipulate lamang sa mga dokumentong pareho namang hawak ng magkabilang panig, maiiwasan ang paulit-ulit na pagtukoy sa bawat exhibit nang isa-isa, na makatutulong sana upang mapabilis ang paglilitis.
Kinuwestiyon din ni Atty. Amando Virgil Ligutan, kabilang sa mga abogado ng prosecution, ang argumento ng defense na baka magkaiba ang mga dokumentong ipinapakita ng mga auditor ng Commission on Audit (COA) sa mga isinumite ng OVP at DepEd.
Tinawag ni Ligutan na “hindi karaniwan” (unusual) ang argumentong ito, sabay paalala na tumanggi na ang defense na mag-stipulate noong pretrial at binigyan lamang muli ng panibagong pagkakataon ngayong linggo.
About the Author
