Bumaba ang insidente ng gutom sa mga pamilyang kabilang sa ‘Walang Gutom Program’ ng DSWD – SWS

Naitala ang 6.7 percentage points na pagbaba sa bilang ng mga pamilyang nakararanas ng gutom sa ilalim ng Walang Gutom Program (WGP) ng Department of Social Welfare and Development (DSWD), ayon sa pinakabagong survey ng Social Weather Stations (SWS).

Sa isang press briefing sa Malacañang, ipinahayag ni DSWD Secretary Rex Gatchalian na mula sa 33.6% sa unang survey (Pebrero 24 hanggang Marso 8, 2026), bumaba sa 26.9% ang antas ng gutom sa ikalawang survey (Hunyo 22 hanggang Hulyo 1, 2026). Ang naturang pag-aaral na pinondohan ng Globe ay nakatuon sa 2,400 pamilyang benepisyaryo ng programa.

Mas kapansin-pansin ang pagbuti ng kalagayan ng mga benepisyaryo kumpara sa mga hindi kasali sa programa, kung saan 2.4 percentage points lamang ang naitalang pagbaba ng gutom (mula 38.3% tungong 36.9%). Bumaba rin ang food insecurity ng mga WGP beneficiaries mula 94.0% tungong 89.3%.

“Kaya na namin ngayon sabihin na 600,000 na pamilyang Pilipino ang kumakain na nang tama,” pahayag ni Gatchalian.

Paggamit ng Electronic Benefit Transfer (EBT) Cards

Sa ilalim ng WGP, nakatatanggap ang bawat kwalipikadong pamilya ng ₱3,000 na food credits buwan-buwan sa pamamagitan ng Electronic Benefit Transfer (EBT) cards. Magagamit ito sa pagbili ng mga masustansyang pagkain sa mga accredited retailer tulad ng KADIWA stores at mga market-based site.

Ayon kay Gatchalian, ang natitirang 150,000 pamilya upang maabot ang target na 750,000 ay ilalaan para sa mga buntis at nagpapasusong ina. Alinsunod ito sa direktiba ni Pangulong Ferdinand R. Marcos Jr. na labanan ang stunting o pagkabansot at tiyaking sapat ang nutrisyon ng pamilyang Pilipino.

Patuloy na babantayan ng DSWD ang epekto ng programa sa tulong ng mga survey tulad ng SWS tracker upang maging gabay sa mas epektibong pagpapatupad nito.

About the Author

Janet Bayan

Administrator

View All Posts