OFW Lounge sa Clark International Airport, bubuksan na sa susunod na buwan; OWWA Academy, ilulunsad din

Marami pa ang dapat abangan ng mga overseas Filipino worker (OFWs) mula sa Overseas Workers Welfare Administration (OWWA).

Sa programang “Usap-Usapan” ng Radyo Pilipinas World Service, ibinahagi muli ni OWWA Administrator Atty. Patricia Yvonne “PY” Caunan na ngayong Setyembre na bubuksan ang ika-apat na OFW Lounge sa Clark International Airport.

Ito ay kasunod ng mga OFW Lounge sa Terminals 1 at 3 ng Ninoy Aquino International Airport (NAIA), at sa Mactan-Cebu International Airport.

Isa ring inaantabayanan ang paglulunsad ng OWWA Academy, na ayon kay Administrator Caunan ay naging posible sa pakikipagtulungan ng ahensya sa Technical Education and Skills Development Authority (TESDA), Department of Labor and Employment (DOLE), at Department of Migrant Workers (DMW).

Aniya, maraming ibinibigay na pagsasanay ang OWWA sa mga OFW — mapa-land-based o sea-based man.

Kasama rin, ani Administrator Caunan, sa makikinabang sa OWWA Academy ang mga mahal sa buhay ng OFWs.

Pabibigay-diin ng OWWA official, magsisilbing training and job center ang OWWA Academy na nakatutok sa livelihood at employment facilitation.

About the Author

Steph Vicente

Author

View All Posts