Photo courtesy of Department of Budget and Management
Naglaan ang Department of Budget and Management (DBM) ng ₱9.753 bilyon sa Commission on Higher Education (CHED) para matugunan ang kakulangan sa pondo ng Free Higher Education (FHE) Program ng 108 State Universities and Colleges (SUCs) sa buong bansa.
Saklaw ng pondo ang mga gastusing naipon ng mga SUC mula Academic Year 2022–2023 hanggang 2024–2025. Sa pamamagitan nito, mababawasan ang pinansiyal na pasaning kinailangang sagutin ng mga SUC gamit ang sarili nilang pondo.
Ayon kay DBM Acting Secretary Kim Robert C. De Leon, ipinapakita ng naturang pondo ang patuloy na prayoridad ng pamahalaan sa edukasyon, habang tinitiyak ang maingat at responsableng paggamit ng limitadong pondo ng gobyerno.
Inaasahang magbibigay rin ito ng mas malaking fiscal space sa mga SUC para mapahusay ang mga programang pang-akademiko, student services, laboratoryo, aklatan, silid-aralan, at iba pang pasilidad.
Ang FHE Program ay itinatag sa ilalim ng Republic Act No. 10931 o Universal Access to Quality Tertiary Education Act, na nagbibigay ng libreng tuition at iba pang school fees sa mga kwalipikadong estudyante sa mga SUC at iba pang kinikilalang institusyon.
About the Author
