Photo courtesy of the National Commission for Culture and the Arts
Likas sa ating mga Pilipino ang pagiging malikhain — mula sa sining, musika, pelikula, disenyo, teatro, hanggang sa pagsusulat at digital arts. Ngayong Setyembre, muling nagniningning ang bansa sa pagdiriwang ng Philippine Creative Industries Month (PCIM).
Bitbit ang temang “Celebrating Filipino Creativity, Advancing Creative Philippines”, hindi lamang ipinapakita ng okasyong ito ang galing ng mga lokal na talento kundi pinatutunayan din nito na ang sining at kultura ay mga pangunahing haligi ng ating pambansang pag-unlad.
Sa ilalim ng Republic Act No. 11904 o ang Philippine Creative Industries Development Act (PCIDA), opisyal na itinalaga ang buwan ng Setyembre upang isulong ang mga produkto, serbisyo, at kabuhayan ng mga malikhain sa bansa.
Sa pangunguna ng Philippine Creative Industries Development Council (PCIDC), Department of Trade and Industry (DTI), at ng National Commission for Culture and the Arts (NCCA), ang naturang batas ay nagsisilbing tulay para sa milyun-milyong Pilipinong manggagawa sa sining. Ang layunin ay malinaw at matapang — iangat ang Pilipinas upang maging Asia’s Premier Creative Hub pagsapit ng 2030.
Saklaw ng pagdiriwang ng PCIM ang siyam na malikhaing dominyo: Audio-Visual Media, Digital Interactive Media, Design, Visual Arts, Performing Arts, Creative Services, Publishing and Printed Media, Traditional Cultural Expressions, at Cultural Sites.
Sa buong buwan, naging buhay na entablado ang bansa sa pamamagitan ng mga programang tulad ng Malikhaing Pinoy Creative Expo (MPEx) at mga kapistahan na ipinagdiriwang sa iba’t ibang probinsya sa Pilipinas. Ipinapakita ng mga ito na ang pagiging malikhain ay hindi lamang libangan, kundi isang industriyang nagpapatakbo ng ekonomiya at nagbibigay ng libo-libong trabaho.
Ang Philippine Creative Industries Month ay isang paalala na ang pinakamayaman at hindi mauubos na likas na yaman ng Pilipinas ay ang kanyang malikhaing mga mamamayan. Sa pagpapatuloy ng mga inisyatibang ito, ang bawat hakbang ng bawat isang malikhaing Pilipino ay nagiging sama-samang pag-abante ng buong bansa patungo sa mas makulay at maunlad na bukas.
About the Author
