Ipinag-utos na ng Malacañang sa Department of Health (DOH) na makipagtulungan nang mabuti sa mga partner healthcare facility upang mapabilis ang pagproseso ng mga claim sa ilalim ng Medical Assistance to Indigent and Financially Capacitated Patients (MAIFIP) Program.
Sa isang pahayag, binigyang-diin ni Executive Secretary Ralph Recto ang kahalagahan ng maayos na koordinasyon sa pagitan ng DOH at ng mga serbisyong pangkalusugan upang matiyak ang mabilis at epektibong pagpapatupad ng nasabing programa.
“Let us continue coordinating with the regional directors, verify the accounts payable, and process the valid claims promptly. These funds are available to support our patients and our partner hospitals,” pahayag ni Recto.
Isinagawa ang direktiba matapos maglabas ang Department of Budget and Management (DBM) ng PHP27.4 bilyon sa DOH sa ilalim ng 2026 General Appropriations Act para sa patuloy na pagpapatupad ng MAIFIP.
Ang nasabing alokasyon ay nagpapakita ng pangako ni Pangulong Ferdinand R. Marcos Jr. na tiyaking handa at accessible ang mga pinagkukunang-yaman ng gobyerno para sa mga pamilyang nahaharap sa pagsubok sa kalusugan at pananalapi.
Sasaluhin ng pondo ng MAIFIP ang mga valid claim para sa mga pangunahing serbisyong pangkalusugan tulad ng hospitalization, gamot, emergency treatment, professional fees, at iba pang kinakailangang gastusing medikal.
Sinabi ni Recto na ang mabilis na pagproseso ng mga claim ay makatutulong upang hindi maantala ang pagbibigay ng serbisyong pangkalusugan, lalo na sa mga pasyenteng mula sa mahihirap na komunidad. Dagdag pa niya, mahalagang suportahan ang mga kalahok na ospital upang mapalakas ang kanilang operasyon.
“For President Marcos, every available resource must be used to deliver meaningful assistance to the Filipino people. Through MAIFIP, we are helping patients obtain the care they need while supporting hospitals that serve communities every day,” dagdag ng opisyal.
Sa inilabas na pondo, humigit-kumulang PHP19.14 bilyon ang ipamamahagi sa DOH Centers for Health Development para sa tulong-medikal sa pamamagitan ng mga regional network at partner hospitals sa buong bansa.
Inilaan naman ang PHP4.35 bilyon para sa mga ospital ng DOH sa Metro Manila at iba’t ibang rehiyon, habang PHP2.91 bilyon ang mapupunta sa Lung Center of the Philippines, National Kidney and Transplant Institute, Philippine Children’s Medical Center, at Philippine Heart Center.
Tatanggap naman ang University of the Philippines – Philippine General Hospital (UP-PGH) ng PHP950 milyon, habang PHP52 milyon ang nakalaan para sa mga Drug Abuse Treatment and Rehabilitation Center.
About the Author
