Inaasahang ipipresinta ng House prosecution panel ngayong linggo ang mga ebidensya kaugnay sa mga kumpanyang idineklarang may financial interest si Vice President Sara Duterte sa kanyang Statements of Assets, Liabilities, and Net Worth (SALN) at sinasabing nagkaroon ng transaksyon sa gobyerno.
Una nang pina-subpoena ng Senate Impeachment Court para humarap na saksi sa trial ngayong linggo sina Civil Service Commission (CSC) Assistant Commissioner Ariel Ronquillo, Securities and Exchange Commission (SEC) Company Registration and Monitoring Department Director Gerardo del Rosario.at Philippine Government Electronic Procurement System (PhilGEPS) Division Chief Rendell Sopeña.
Inaasahang tatalakayin ni Ronquillo ang mga patakaran sa paghahanda at paghahain ng SALN, kabilang ang mga alituntuning tumulong siyang buuin.
Si Del Rosario naman ang magpapatunay sa mga corporate record ng Securities Exchange Commission (SEC) kaugnay sa mga kumpanyang idineklarang may business interest si VP Sara.
Samantalang ihaharap ni Sopeña ang mga rekord ng government procurement, kabilang ang mga kontrata ng Gencorp Industries Inc. sa mga ahensya ng gobyerno mula 2020 hanggang sa kasalukuyan.
Base sa SALN ng bise presidente, idineklarang may financial interest ito sa Gencorp.
Batay sa mga ulat, nakakuha ang Gencorp ng ₱14-milyong kontrata sa Davao City government na pinamumunuan ni Mayor Sebastian Duterte.
Na-subpoena na rin si Mayor Baste para humarap sa impeachment court.
About the Author
