Pinalalakas ng Korte Suprema ang kakayahan ng hudikatura sa paghawak ng mga kasong may kaugnayan sa international arbitration bilang bahagi ng paghahanda sa Pilipinas na maging mas aktibong arbitration hub sa rehiyon.
Pinangunahan ng Philippine Judicial Academy o PHILJA, katuwang ang Supreme Court Technical Working Group on the Revision of the Special Rules of Court on Alternative Dispute Resolution na pinamumunuan ni Supreme Court Associate Justice Alfredo Benjamin S. Caguioa, ang limang araw na Judicial Training and Colloquium on International Arbitration and the New York Convention sa Tagaytay City, Cavite.
Ayon kay Supreme Court Associate Justice Maria Filomena D. Singh, Vice-Chairperson ng Sub-Committee for the Revision of the Rules of Civil Procedure, mahalagang mas maging pamilyar ang mga hukom sa international arbitration dahil may mga kasong nangangailangan ng pagdedesisyon sa arbitration agreements, interim relief at pagpapatupad ng foreign arbitral awards.
Tinalakay rin sa programa ang New York Convention, sovereign immunity, public policy, government contracts at iba pang usapin sa international arbitration.
Sinabi naman ni Caguioa na gagamitin ang mga natukoy na problema at rekomendasyon mula sa training bilang gabay sa planong rebisyon ng Special ADR Rules upang mas umangkop sa kasalukuyang pangangailangan ng arbitration sa bansa.
About the Author
