Yaman ng telang Pilipino, matutunghayan sa Likhang Habi Market Fair ngayong Oktubre

Ang sining ng katutubong paghahabi sa Pilipinas ay hindi lamang kuwento ng nakaraan, kundi isang masiglang patunay ng ating pambansang identidad. Sa darating na Oktubre 9-11, 2026, muli itong magiging sentro ng pagpupugay sa kulturang Pilipino.

Sa pagbubukas ng ika-16 na edisyon ng Likhang HABI Market Fair na may temang “Worth Every Thread,” bibigyang-diin ng HABI: The Philippine Textile Council ang sakripisyo, talino, at kuwentong nakatago sa likod ng bawat hibla.

Magsasama-sama ang higit sa 100 piling exhibitors mula sa mga katutubong komunidad, maliliit na negosyo, hanggang sa mga kilalang kontemporaryong disenyador. Tampok sa taunang pagtitipong ito ang mga sikat na telang sumasalamin sa yaman ng iba’t ibang rehiyon tulad ng Inabel ng Ilocos, Suksok ng Aklan, at T’nalak ng Cotabato, gayundin ang malikhaing paggamit sa mga likas na hibla ng abaca at pinya.

Tampok dito ang mga katutubong weaver, artisan, at lokal na taga-disenyo na magpapakita ng yaman ng kulturang Pilipino sa pamamagitan ng mga inihandang aktibidad, tulad ng Kwentong Kultura, exhibit, workshop, TELAserye: HABI Docu Screenings, at mga weaving competition.

Ayon kay Adelaida Lim, Co-Founder at President Emeritus ng HABI, malaki na ang ipinagbago ng pagtingin ng publiko sa ating mga katutubong tela. Kung dati ay itinuturing lamang ang mga ito bilang kasuotan sa mga espesyal na okasyon o kultural na pagtatanghal, ngayon ay bahagi na ito ng modernong pamumuhay. Makikita na ang mga tradisyonal na habi sa mga pang-opisina at pang-araw-araw na damit, sapatos, at kagamitang pambahay—isang patunay na ang tradisyon ay patuloy na nakasasabay sa modernong panahon.

Hindi lamang ito isang simpleng pamilihan. Ang tatlong araw na pagdiriwang ay magbibigay daan din sa “Kwentong Kultura: HABI Lectures,” na tatalakay sa preserbasyon at pagpapahalaga sa mga lokal na tela.

Magkakaroon din ng pagpapalabas ng mga dokumentaryo tulad ng Threaded Traditions at mga espesyal na tampok mula sa i-Witness ng GMA News. Bukod dito, masasaksihan ng mga bisita ang mga natatanging likha mula sa 9th Lourdes Montinola Piña Weaving Competition at 5th Eloisa Hizon Gomez Abaca Weaving Competition.

Ang pagbisita sa Likhang HABI ngayong Oktubre ay hindi lamang isang pagkakataon para mamili, ito ay isang aktibong pakikibahagi sa pagpapanatili ng kabuhayan ng mga lokal na artisan at pagprotekta sa ating pamana.

Ang bawat pirasong gawang kamay na iyong iuuwi ay may taglay na kuwento ng pangarap at kasaysayan ng isang komunidad na patuloy na lumalaban upang hindi mabaon sa limot ang ating kultura.

Huwag palampasin ang pagkakataong masaksihan at maranasan ang ganda ng sining ng Pilipinas mula Oktubre 9-11, 2026 sa ganap na 10:00 AM hanggang 9:00 PM sa One Ayala.

Sabay-sabay nating tuklasin kung bakit ang bawat hibla ng ating pagkakakilanlan ay tunay na worth every thread.