Muling nagiging sentro ng talakayan sa lohistika at kalakalan ang Pilipinas sa pagho-host ng Philippine Postal Corporation (PHLPost) sa mga pinuno ng postal mula sa Timog-Silangang Asya at mga kasosyong bansa mula Oktubre 5 hanggang 7.
Ang tatlong araw na kaganapan ay naglalayong palawakin ang cross-border e-commerce at paghusayin ang mga serbisyong postal at lohistika sa buong rehiyon.
Ginanap sa Manila Marriott Hotel sa Lungsod ng Pasay, pinagsama-sama ng 32nd ASEAN Postal Business Meeting (APBM) at ASEANPOST++ Meeting ang mga organisasyong postal mula sa mga kasaping bansa ng ASEAN, pati na rin ang mga kinatawan mula sa Australia, Tsina, Hong Kong, India, Hapon, at Timog Korea.
Naging pangunahing pokus ng mga pagpupulong ang mga sumusunod na paksa:
- Cross-border e-commerce at lohistika: Pagpapalawak ng mga serbisyo para sa online trade sa rehiyon.
- Pinagsamang serbisyo: Pag-aaral sa mga posibleng pakikipag-ugnayan na nag-uugnay ng customs clearance at last-mile delivery sa mga kalahok na network.
- Proseso ng pagbabalik ng produkto (returns): Pagpapadali sa sistema ng pagbabalik ng item para sa mga negosyante at mamimili.
- Inprastraktura: Paggamit ng mga pasilidad ng postal para sa micro-fulfillment operations.
- Teknolohiya at Inobasyon: Pagtataguyod ng makabagong sistema at sustainability habang mabilis na lumalago ang online shopping sa buong mundo.
Nagsimula ang programa noong Oktubre 5 sa pagbubukas ng ASEANPOST++ Meeting na nagpatuloy hanggang sa umaga ng Oktubre 6. Isinagawa naman ang APBM sa hapon ng Oktubre 6, na nagtapos sa pagpapatibay ng mga kasunduan at paglagda sa mga desisyong napagkasunduan ng mga organisasyon. Magtatapos ang pagtitipon sa Oktubre 7 sa pamamagitan ng isang tour para sa mga delegado.
Ayon sa PHLPost, ang serye ng mga pulong na ito ay nagbibigay ng mahalagang plataporma upang mas maging integrated at maayos ang koordinasyon ng mga proyekto sa serbisyong postal at lohistika sa buong Timog-Silangang Asya.