Photo courtesy of National Commission for Culture and the Arts
Opisyal nang binuksan sa buong bansa ang pagdiriwang ng Museums and Galleries Month (MGM) ngayong buwan ng Oktubre 2026 upang mas mapalalim ang kamalayan at pagkilala ng mga Pilipino sa kanilang pambansang pamana, kasaysayan, at sining.
Sa ilalim ng Presidential Proclamation No. 798, s. 1991, pinangungunahan ng National Commission for Culture and the Arts (NCCA) kasama ang iba’t ibang ahensya at museo ang mga serye ng libreng exhibit, art fairs, at workshops para sa publiko.
Layunin nitong ilapit ang sining sa masa at ipakita ang kahalagahan ng mga museo bilang lunsaran ng pagkakakilanlang Pilipino.
Dala ang opisyal na temang “Bridging Divides: Preserving the Present for Tomorrow,” nakatutok ang pagdiriwang ngayong taon sa paggiba ng mga harang at hangganan upang gawing mas inklusibo at mailapit sa publiko ang sining at kultura.
Binibigyang-diin nito na ang mga kasalukuyang kuwento, sining, at pamumuhay ay ang pamanang iingatan para sa susunod na salinlahi.
Ayon sa mga tagapagtaguyod ng sining, ang mga museo at galerya ay hindi lamang mga imbakan ng mga lumang kagamitan, kundi mga buhay na espasyo para sa pag-aaral, talakayan, at pagtuklas ng sariling pagkakakilanlan.
Inaanyayahan ng National Museum of the Philippines at National Historical Commission of the Philippines (NHCP) ang mga pamilya, mag-aaral, at mga lokal na turista na samantalahin ang mga libreng programa at bisitahin ang mga kalapit na museo sa kanilang lugar upang makibahagi sa pagpupugay sa sining at kulturang Pilipino.
About the Author
