Itinutulak ni House lead prosecutor at Batangas Representative Gerville Luistro ang pagrepaso sa mga batas laban sa money laundering, tax evasion, graft at iba pang financial irregularities kasunod ng mga natuklasan sa impeachment trial ni Vice President Sara Duterte.
Ayon kay Luistro, kailangang linawin ang mandato ng Anti-Money Laundering Council o AMLC at palakasin ang koordinasyon nito sa Ombudsman at Department of Justice upang matiyak na maaaksyunan ang mga natutuklasang iregularidad.
Iminungkahi rin niya na linawin ang mga patakaran sa pagbubuwis, partikular ang aksiyong dapat gawin ng Bureau of Internal Revenue kapag may nakitang posibleng hindi idineklarang kita.
Kabilang din sa nais niyang repasuhin ang Republic Act 6713 o Code of Conduct and Ethical Standards for Public Officials and Employees, partikular ang paghahain ng Statements of Assets, Liabilities and Net Worth o SALN.
Isinama rin niya sa mga panukalang repasuhin ang New Government Procurement Act, Anti-Graft and Corrupt Practices Act, securities regulations at mga tuntunin ng Commission on Audit.
Binigyang-diin ni Luistro na bukod sa posibleng pagbabago sa mga batas, mahalaga ring palakasin ang pagpapatupad ng mga ito upang matiyak na may pananagutan ang sinumang mapatutunayang lumabag.
About the Author
