Nananatili sa Alert Level 2 ang Bulkang Mayon batay sa 24-oras na monitoring ng Philippine Institute of Volcanology and Seismology (PHIVOLCS) ngayong Oktubre 25, 2026, sa kabila ng pagbaba ng aktibidad nito. Naitala ang minor Strombolian activity at isang pagbuga ng abo na tumagal nang 32 segundo.
Ayon sa PHIVOLCS, nakapagtala rin ng 14 na volcanic earthquake, nakikitang crater glow, at sulfur dioxide emission na 1,333 tonelada kada araw noong Oktubre 24. Katamtaman ang plume o usok ng bulkan at napadpad sa hilaga-hilagang-silangan, habang may naobserbahang panandaliang pag-impis ng lupa sa parehong direksiyon.
Mahigpit na ipinagbabawal ang pagpasok sa anim na kilometrong Permanent Danger Zone (PDZ) at ang pagpapalipad ng anumang sasakyang panghimpapawid malapit sa bulkan.
Nagbabala rin ang ahensiya sa posibleng biglaang pagputok ng singaw, rockfall mula sa tuktok, at pag-agos ng lahar kapag may matinding pag-ulan.
Patuloy ang pagbabantay ng PHIVOLCS sa kondisyon ng Bulkang Mayon, na matatagpuan sa lalawigan ng Albay. Pinapayuhan ang mga residente at lokal na awtoridad na sundin ang mga opisyal na abiso at kahandaan sa sakuna upang mapangalagaan ang kaligtasan ng mga komunidad na maaaring maapektuhan.
About the Author
