Target na mabuksan sa publiko bago sumapit ang Pasko ang halos 20 kilometrong segment ng expressway mula Governor’s Drive hanggang CAVITEX, kabilang ang CALAX Subsections 1 at 2 at ang CAVITEX-CALAX Link o CCLINK.
Ayon kay Department of Transportation o DOTr Secretary Vince Dizon, pumalo na sa 97% ang completion rate ng nasabing proyekto.
Dahil dito, irerekomenda nila kay Pangulong Ferdinand R. Marcos Jr. ang pormal na pagbubukas ng ruta sa darating na buwan ng Disyembre upang mapakinabangan na ng mga motorista bago ang Kapaskuhan.
Saklaw ng halos 20-kilometrong dugtong na ito ang mahahalagang bahagi ng Cavite-Laguna Expressway (CALAX) Subsections 1 at 2 at ang CAVITEX-CALAX Link (CCLINK), na nag-uugnay sa lugar ng Governor’s Drive at sa Manila-Cavite Expressway (CAVITEX).
Bukod sa malaking matitipid sa oras ng biyahe dahil sa mas direkta at tuloy-tuloy na daloy ng trapiko, inaasahan ding makababawas ang bagong bukas na segment sa gastusin at konsumo sa gasolina ng mga motorista.
Magbibigay rin ito ng mas mabilis, mas ligtas, at mas maginhawang paglalakbay para sa mga uuwi o mamamasyal sa Cavite, Laguna, at mga karatig-lalawigan ngayong holiday season.
