Umabot sa 385 job applicants ang natanggap agad ng trabaho matapos ang isinagawang Kalayaan Job Fair sa SM City Valenzuela kahapon, June 11 bilang bahagi ng paggunita sa Araw ng Kalayaan.
Umabot sa 31 kumpanya ang lumahok sa one-day recruitment event na nag-alok ng 2,190 local at overseas job vacancies para sa mga naghahanap ng trabaho.
Dumalo naman sa job fair ang nasa 1,130 job seekers kabilang ang mga fresh graduate, first-time job applicants, career shifters, experienced workers, at returning overseas Filipino workers o OFWs.
Isinagawa ang aktibidad sa pakikipagtulungan ng Department of Labor and Employment (DOLE) at Valenzuela City Public Employment Service Office (PESO), kung saan nagtipon ang mga employer mula sa iba’t ibang industriya tulad ng retail, manufacturing, food service, construction, information technology, at business process outsourcing o BPO.
Naglaan din ng one-stop pre-employment services hub para mapadali ang proseso ng aplikasyon, kung saan tumulong ang ilang ahensya ng pamahalaan gaya ng SSS, Pag-IBIG Fund, PhilHealth, Philippine Statistics Authority, at Bureau of Internal Revenue.
Para naman sa mga naghahanap ng trabaho sa abroad, nagbigay rin ng serbisyo ang Department of Migrant Workers, Overseas Workers Welfare Administration, at TESDA kabilang ang pre-employment orientation at certification assistance.#
About the Author
