Muling nagdala ng karangalan sa bansa ang mga estudyanteng Pilipino matapos masungkit ang ikatlong puwesto sa prestihiyosong Kibo Robot Programming Challenge (Kibo-RPC), ayon sa ulat ng Philippine Space Agency (PhilSA) nitong Huwebes.
Binuo ng mga ikatlong taong mag-aaral ng Aerospace Engineering mula sa Batangas State University (BatStateU), ang koponang pinangalanang “Inflection Point” ay binubuo nina:
- Howell Dela Cruz
- John Royeth Samson
- Ahron Martinez
- Benedict Lontok
- Andrew Cabile
- Amer Panganiban
Hinarap ng grupo ang matinding kompetisyon laban sa 738 koponan mula sa higit 30 bansa sa buong mundo.
Sa huling yugto ng kompetisyon na ginanap mismong sa kalawakan sa loob ng International Space Station (ISS) noong Pebrero 28, matagumpay na nakontrol at naatasan ng mga estudyante ang Astrobee robot ng NASA. Ginamit nila ang kanilang sariling computer program upang magsagawa ng mga misyon sa loob ng Kibo module ng Japan Aerospace Exploration Agency (JAXA).
Sinubok sa kompetisyon ang bilis at accuracy (katumpakan) ng kanilang programa sa image recognition (pagkilala sa mga imahe) at pagpapatakbo ng robot sa ilalim ng microgravity (kawalan ng grabidad). Matagumpay na natapos ng Inflection Point ang apat sa limang inihaing gawain, na nagbigay sa kanila ng kabuuang puntos na 216.8 bawat 300.
Ayon sa PhilSA, ang tagumpay na ito ay pagpapatuloy ng magandang simula ng Pilipinas sa nasabing paligsahan. Noong nakaraang taon (2024), ang parehong koponan din ang naging unang kinatawan ng bansa na sumali at pinalad na makakuha naman ng ikalawang puwesto sa kanilang debut.
Ang Kibo-RPC ay isang taunang paligsahan para sa mga mag-aaral sa rehiyong Asia-Pacific. Layunin nitong sanayin ang susunod na henerasyon ng mga eksperto sa paggabay at pag-program ng mga robot sa kalawakan, habang sinusubok ang kanilang galing sa pagtutulungan at siyensya.
About the Author
