Isyu ng confidential funds ni VP Sara, isasalang na sa Impeachment Trial

Melany Valdoz-Reyes July 16, 2026 1 minute read

Nakatakda nang isalang sa Senate impeachment trial ang kontrobersiyal na usapin hinggil sa umano’y maling paggamit ni Vice President Sara Duterte sa ₱612.5 milyong confidential funds ng Office of the Vice President (OVP) at Department of Education (DepEd).

Ito ay matapos na pormal na hilingin ni lead prosecutor at Batangas 2nd District Rep. Gerville “Jinky Bitrics” Luistro sa impeachment court ang subpoena ng ilang mga testigo.

Inaprubahan naman ng korte, sa pamumuno ni presiding officer at Senate President Francis “Chiz” Escudero, ang pagpapatawag sa mga testigo.

Ito ay sina:

Marivic Pareja: Mula sa Legislative Archives and Museum Management Service ng Kamara.
Violeta Constantino: Dating branch manager ng LandBank Shaw Boulevard branch.
Nenita Camposano: Dating branch manager ng LandBank DepEd branch.

Ayon kay Luistro, inaasahang tatapusin ng prosekusyon ang paghaharap ng ebidensya para sa Article IV (grave threats at inciting to sedition) sa susunod na Martes, July 21, kung saan isasalang bilang huling testigo si National Bureau of Investigation (NBI) Director Atty. Melvin Matibag.