Nagtalaga si Pangulong Ferdinand Marcos Jr. ng dalawang bagong Associate Justices ng Court of Tax Appeals (CTA).
Ito ay sina Atty. Debbie Jean Centeno-Dijamco at Atty. Paolo Teston.
Susuporta sina Centeno-Dijamco at Teston kay Presiding Justice Ma. Belen Ringpis-Liban sa paggampan ng mga tungkulin ng CTA.
Kung matatandaan, si Centeno-Dijamco ay unang nagsilbi bilang Undersecretary ng Department of Education (DepEd) mula 2025 hanggang 2026.
Ayon sa Presidential Communications Office (PCO), nagtapos siya ng Bachelor of Arts in Economics sa University of Santo Tomas noong 1995 at Bachelor of Laws sa San Beda College noong 1999. Natapos din niya ang Management Development Program sa Asian Institute of Management noong 2007 at ang Pre-Judicature Program for Appellate Courts sa Philippine Judicial Academy noong 2022.
Nakapaglingkod din siya bilang Judicial Staff Head ni dating Presiding Justice Hon. Roman Del Rosario mula 2013 hanggang 2025.
Samantala, si Atty. Teston ay unang nagsilbi bilang faculty member ng Manuel L. Quezon University-College of Law mula 2024 hanggang sa kasalukuyan.
Nagsilbi rin siya bilang Director General ng Food and Drug Administration (FDA) mula 2025 hanggang 2026.
Ayon pa sa PCO, nagtapos siya ng Bachelor of Arts in Economics sa San Beda College noong 2000 at Bachelor of Laws sa parehong institusyon noong 2005. Natapos din niya ang Pre-Judicature Program for Appellate Courts sa Philippine Judicial Academy noong 2024.