Inilunsad ng Department of Information and Communications Technology (DICT) ang eTrabaho, isang bagong tampok sa eGovPH Super App na gumagamit ng Artificial Intelligence (AI) upang tulungan ang mga Pilipinong maghanap ng trabaho at gumawa ng resume nang hindi na kailangang umalis ng bahay.
Sa panayam ng Bagong Pilipinas Ngayon sa PTV, ipinaliwanag ni DICT E-Government Undersecretary David Almirol Jr. na ang eTrabaho ay nagsisilbing isang online job fair.
“Pagka-click mo doon, puwede ka nang mag-build ng résumé mo, AI-powered iyon. Hindi mo kailangan mag-manual, piktyuran mo lang iyong lumang résumé mo, i-upload mo iyong lumang résumé mo, bahala na iyong AI ang mag-arrange ng napakagandang CV mo, résumé mo,” ani Almirol.
Bukod sa resume builder, mayroon ding job-matching engine ang eTrabaho na awtomatikong nag-uugnay sa mga aplikante sa mga kumpanyang angkop sa kanilang kwalipikasyon at profile.
Malawakang Sektor at Bagong Tampok
Plano ng DICT na palawigin pa ang eTrabaho sa pakikipagtulungan sa:
- Department of Labor and Employment (DOLE)
- Technical Education and Skills Development Authority (TESDA)
- Professional Regulation Commission (PRC)
- Commission on Higher Education (CHED)
Isinusulong na rin ang pagbuo ng eFolder kasama ang CHED, kung saan mai-aattach ng mga gumagamit ang kanilang digital diploma, transcript of records (TOR), at iba pang dokumento sa kanilang digital resume.
Iba Pang Serbisyo sa eGovPH App
Sa kasalukuyan, mayroon nang 61 milyong gumagamit ang eGovPH Super App, na maaari nang ma-download sa Google Play Store at Apple App Store. Ilan pa sa mga nakatakdang i-integrate at i-update sa app ay ang mga sumusunod:
| Kategorya | MGA SERBISYO AT PLANO |
| Ahensya ng Gobyerno | Integration ng Bureau of Internal Revenue (BIR) at Social Security System (SSS) kasama ang PhilHealth, Pag-IBIG, at GSIS. |
| Pampublikong Dokumento | Online passport renewal at Philippine National Police (PNP) clearance para maiwasan ang mahabang pila. |
| Kagipitan (Emergency) | 911 integration sa DILG kung saan matutukoy ang tumawag upang maiwasan ang prank calls. |
| Para sa OFWs | One-Stop Shop kasama ang DMW at OWWA para sa mga serbisyong pampamahalaan mula sa ibang bansa. |
Para naman sa mga hindi pa sanay sa digital na pamamaraan, nakatakdang magbukas ang DICT ng tatlo pang physical eGov Serbisyo Centers sa buong bansa, bukod sa kasalukuyang naitatag na sa San Juan at Cebu.
About the Author
